কবিতা

জয় মা দুৰ্গা

শেৱালি ফুলবোৰে সুগন্ধি বিলাইছে,

শাৰদীয় দুৰ্গোৎসৱৰ সময় এয়া।

আকাশখনে তৰাৰ সৈতে সন্ধি কৰিছে ,

যেন এবুকু মৰম দিয়াৰ সন্ধি ;

এবুকু পোহৰ দিয়াৰ সন্ধি।

নিয়মবোৰে ফুলে ফুলে গছৰ পাতে পাতে হাঁহি বিলাইছে,

 কি মায়াময় এই পৃথিৱী

চৌদিশে কেৱল সুন্দৰতা আৰু সুন্দৰতা।

শাৰদীয় জোনাকভৰা  চোতালখনত ,

     আমোলমোল শেৱালিফুলৰ স্নিগ্ধতা ।

স্মৃতিৰ সঁফুৰা খুলি শৈশৱে ৰিঙিয়াই,

কোচভৰা শেৱালি ফুল ফুলাৰ দিনবোৰ ।

শৈশৱে ৰিঙিয়াই মাতে গাঁৱৰ পদূলিবোৰত ,

      নিয়ৰসনা সৰাপাত বোৰ গছকি

       খোজকঢ়া সেই সময়খিনি।

শৈশৱতে ৰিঙিয়াই স্মৃতিৰ দলিচা পাতি দিয়ে,

 জাৰকালিৰ দেহা শীতল কৰা

             মলয়া বতাহ চাটি।

ৰঙা, নীলা , হালধীয়া বেলুনেৰে ভৰা এখন হাত,

আনখন হাতত জেলেপীৰ টোপোলা।

সেইবোৰ শৈশৱ মিঠা শৈশৱ মোৰ ,

মিঠা শৈশৱে বাৰুকৈয়ে মনবোৰ জীপাল কৰে,ৰঙিয়াল কৰে।

দুৰ্গা দেৱীক পূজা অৰ্চনা কৰাৰ সময় সমাগত,

ঢাক- ঢোলেৰে পূজাৰ বেদী মুখৰিত হ’ব।

আকৌ আহিব দেৱী ধৰালৈ নামি,

পৃথিৱীৰ অসূয়া অশান্তি দূৰ কৰিবলৈ ।

পৃথিৱীৰ দস্যু দানৱক নিধন কৰিবলৈ,

দেৱী মা পুনৰ আহিব ধৰালৈ।

বাৰম্বাৰ প্ৰতিষ্ঠাত কৰোঁ তোমাক আমি ,

                  জয় দেৱী মা ।

                   জয় দুৰ্গা মা।

                    জয়‌ দুৰ্গা মা ।

______________

মমী বৰঠাকুৰ

গুৱাহাটী ভেটাপাৰা ( নন্দন পথ )

(৮৩৯৯৯৮৬৬১৭ ফোন নং)

Leave a Reply

Your email address will not be published. Required fields are marked *